പാല്‍പ്പായസം

ഇടികള്‍ക്കിടയില്‍
ചതഞ്ഞുചോരചീറ്റിയ
വെറ്റിലക്കഷണങ്ങളിലൊന്ന്
തെറിച്ചുപോകാതെ തടഞ്ഞ്,
ഇനിയും വരാനിരിക്കുന്ന
ഓണമുണ്ണാനാകുമോയെന്ന്
വ്യാകുലപ്പെട്ടോരമ്മൂമ്മ
പിന്നെയുമെത്രയോണങ്ങ-
ളുണ്ടിരിക്കുന്നുവെന്നോ.

ഓണം അമ്മൂമ്മക്ക്
മരണത്തിലേക്കുള്ള
മൈല്‍ക്കുറ്റിയും
അമ്മക്ക് ദാരിദ്ര്യത്തിന്റെ
കലണ്ടറിലെ അങ്കലാപ്പേറ്റുന്ന
ചുവന്ന അക്കങ്ങളുടെ ആധിയും
അച്ഛന്,ആരും കാണാതെ
പിന്നാമ്പുറത്തുടയാനിരിക്കുന്ന
ഒരുകുപ്പി മദ്യത്തിന്റെ ലേബലുമാകുന്നു.

മനക്കോട്ടകളില്‍
അശ്വാരൂഢനായിവരുന്ന
കാമുകന്റെ,ഏറെക്കുറഞ്ഞ
അവധിക്കാലത്തെ
ഓണമെന്നു ചുരുക്കിയെഴുതി
മകള്‍ കാത്തിരിക്കുന്നുണ്ട്!

സദ്യക്ക് ഇത്രയുമൊക്കെത്തന്നെ
ധാരാളമാണെന്നുറപ്പെങ്കിലും,
ഒരല്പം സ്വപ്നം തീര്‍ക്കുന്ന
പാല്‍പ്പായസമാണതിന്റെയൊടുക്കം.
അത് ഏതോ മണലാരണ്യത്തില്‍
വിയര്‍പ്പിന്റെയൊപ്പം തിളക്കാന്‍
തുടങ്ങിയിട്ട് നാളെത്രയായെന്നോ?!

കവിത, ഹരിയണ്ണന്‍