“നിഴല്‍ചിത്രങ്ങള്‍”

മഷിയെഴുതിയ നിഴല്‍‌ചിത്രങ്ങള്‍ ബൂലോകത്തു നിന്ന് ഉടന്‍ പുസ്തകശാലകളിലേക്ക്

ബ്ലോഗ്‌ എന്ന ഈ മാദ്ധ്യമം നിരവധി എഴുത്തുകാരുടെ വളര്‍ച്ചക്ക്‌ വഴിയൊരുക്കിയിരിക്കുന്നു.അക്കൂട്ടത്തില്‍ എന്തുകൊണ്ടും എടുത്തു പറയേണ്ടുന്ന ഒരു നാമമാണ്‌ 'കാപ്പിലാന്‍' എന്നത്‌. കാപ്പിലാന്‍ എന്നത് കേരളത്തില്‍ ആലപ്പുഴ ഡിസ്ട്രിക്റ്റില്‍ പെടുന്ന കാപ്പില്‍ എന്ന തന്റെ ജന്മദേശത്തെ സ്നേഹപൂര്‍വ്വം സ്മരിച്ചുകൊണ്ട്‌ ശ്രീ.ലാല്‍ പി.തോമസ്‌ സ്വീകരിച്ചിരിക്കുന്ന ബൂലോകതൂലികാനാമം ആണ്‌.
എടുത്തു പറയേണ്ടത്‌ അദ്ദേഹത്തിന്റെ കവിതകളുടെ വൈവിദ്ധ്യവും അതിനു വിഷയീഭവിച്ചിരിക്കുന്ന വസ്തുതകളുടേയും വസ്തുക്കളുടേയും പ്രത്യേകതകളാണ്‌. നമ്മുടെ ചുറ്റിനും സര്‍വ്വസാധാരണയായി കാണപ്പെടുന്ന പാഴ്‌വസ്തുക്കള്‍ പോലും അദ്ദേഹത്തിന്‌ കവിതയ്ക്ക്‌ വിഷയീഭവിച്ചിരിക്കുന്നു. ഒരിക്കലും ഒരു സാധാരണക്കാരന്റെ മനസ്സില്‍ ഈ വസ്തുക്കള്‍ കവിത ജനിപ്പിക്കും എന്നു നാം പ്രതീക്ഷിക്കുകയേയില്ല. കാപ്പിലാന്‍ എന്ന കവിയുടെ മനസ്സ്‌ ഇവയിലെല്ലാം ഒരു ദാര്‍ശനികതലം ദര്‍ശിക്കുന്നു..
അത്യധികം ലളിതവും സുന്ദരവുമായ പ്രതിപാദന ശൈലിയിലിയുള്ള കാപ്പിലാന്‍ കവിതകള്‍ കൈരളിക്ക്‌ തീര്‍ച്ചയായും ഒരു മുതല്‍ക്കൂട്ടു തന്നെയാണ്‌. അനുവാചക മനസ്സുകളില്‍ ഒരേസമയം അനുഭൂതിയുടെ അനുരണനങ്ങള്‍ ഉണര്‍ത്തുകയും ചിന്താധാരയ്ക്ക്‌ തിരി കൊളുത്തുകയും ചെയ്യുന്നു ഈ കവിതകള്‍. വൃത്തഭംഗിയുടേയും പ്രാസഭംഗിയുടേയും മറ്റും ചട്ടക്കൂട്ടുകളിലൊതുക്കാതെ കവിമനസ്സ്‌ പറയാനുദ്ദേശിക്കുന്ന കാര്യങ്ങള്‍ കൊച്ചുകൊച്ചു വരികളിലൂടെ പറഞ്ഞു വയ്ക്കുക എന്ന രീതിയാണ്‌ കവി ഇവിടെ സ്വീകരിച്ചിരിക്കുന്നത്‌. ഭാവസമ്പുഷ്ടവും അര്‍ത്ഥസമ്പുഷ്ടവുമായ ഈ കൃതികള്‍ വായനക്കാര്‍ക്ക്‌ വിശേഷമായൊരു അനുഭവമായിരിക്കും പകര്‍ന്നു തരിക എന്നതില്‍ സംശയമില്ല.[ അവതാരികയില്‍ നിന്ന്]

പ്രശസ്ത കവിയും പണ്ഡിതനും വാഗ്മിയും സര്‍വ്വോപരി ബൂലോകരുടെ കണ്ണില്‍ ഉണ്ണിയുമായ കാപ്പിലാന്‍ മലയാള ബ്ലോഗിന് ലഭിച്ച ഒരു വരദാനമാണ് .ഈ മാസം അവസാനം കവിയുടെ ജന്മദേശമായ കാപ്പില്‍ വച്ചു നടക്കുന്ന ലളിതമായ ചടങ്ങില്‍ “നിഴല്‍ചിത്രങ്ങള്‍” പ്രകാശനം ചെയ്യും..

ഈ അവസരത്തില്‍ ആശ്രമവാസികളുടെയും

ആല്‍ത്തറയുടെയും അഭിവാദനങ്ങള്‍ അഭിനന്ദനങ്ങള്‍ ആശംസകള്‍