ജവാന്‍ ആര്‍ട്സ് ക്ലബ് - ഒരു "ലഗാന്‍" പുരാണം

ആദ്യം ആരും ശ്രദ്ധിച്ചില്ല

മൈതാനത്തിന്റെ തെക്കു വശത്തുകൂടി, 14- നമ്പര്‍ ജേഴ്സി ഇട്ട, റൈറ്റ് ഫോര്‍വേര്‍ഡ് കെ.റ്റി.മോഹന്‍ മന്ദമന്ദം മുന്നേറി…മിഡ്-ഹാഫ് കഴിഞ്ഞപ്പോഴേക്കുമ്, കാണികള്‍ ആര്‍ത്തിരമ്പി.

സെമി ഫൈനല്‍ ആണ് . എതിര്‍ ടീം ചില്ലറക്കാരല്ല . തൃശൂര്‍ പോലിസ് ക്ലബ്‌ ആണ് , നാട്ടിന്‍ പുറത്തുകാരായ ഞങ്ങളുടെ ജവാന്‍ ആര്‍ട്സ് ക്ലബിനോട് ഏറ്റു മുട്ടുന്നത് … സ്വന്തമായി ഷൂസ് പോലും വാങ്ങാതെ കളിച്ചു പഠിച്ച പിള്ളേരാണ് , പോലീസു കാരോട് കളിക്കുന്നത് .

അങ്ങനെ പേരുകേട്ട ക്ലബ്‌ ഒന്നുമല്ല ..30 വര്‍ഷങ്ങള്‍ക്കു മുന്‍പ് നാട്ടിന്‍പുറത്തെ ക്ലബ്ബുകള്‍ എങ്ങനെയെന്നു എല്ലാവര്ക്കും ഓര്മയുണ്ടായിരിക്കും . അങ്ങനെ യുള്ള ക്ലബ്ബുകളുടെ ഒരു “poor cousin” ആയിരുന്നു ഈ ക്ലബ്‌ . 1962 ഇല്‍ ഇന്‍ഡോ -ചൈന യുദ്ധ കാലത്ത് ഉണ്ടാക്കിയതാനത്രേ . അങ്ങനെ ദേശസ്നേഹ സൂചകമായി ജവാന്‍ എന്ന പേര് വന്നു എന്ന് , പിന്നീട് പൊട്ടി മുളച്ച പല “ചരിത്രകാരന്മാര്‍ ” സാക്ഷ്യപെടുത്തുന്നു .

കോളേജില്‍ പഠിച്ചിരുന്ന ഞങ്ങളെ പോലെ കുറച്ചു പേരെ മാറ്റി നിര്‍ത്തിയാല്‍ , എല്ലാവരും ശരിയായ നാട്ടിന്പുറത്തുകാര്‍ . പകല്‍ മുഴുവന് പാടത്ത് ജോലി ചെയ്തും , കൂലിവേല ചെയ്തും , തൃശൂര്‍ മാര്‍ക്കറ്റില്‍ മാങ്ങ വില്‍ക്കാന്‍ പോയും നടന്ന പിള്ളേരായിരുന്നു അധികവും . ഒരു പ്രത്യേക സമുദായത്തിന് വേണ്ടി , ഒരു പ്രത്യേക രാഷ്ട്രിയ പാര്‍ട്ടിക്ക് വേണ്ടിയുള്ള ഒരു ക്ലബ്‌ എന്നൊരു വിമര്‍ശനം ആദ്യം മുതലേ ഉണ്ടായിരുന്നു . ആറാം വാര്‍ഡിലെ ഈ ക്ലബിലേക്ക്‌, പഞ്ചായത്തിലെ മറ്റു വാര്‍ഡുകളിലെ കുട്ടികള്‍ മെംബെര്‍ഷിപ്‌ എടുക്കാന്‍ പോലും വന്നില്ല .

ആ വിമര്‍ശനത്തില്‍ സത്യവും ഉണ്ടായിരുന്നു . അങ്ങനെയാണ് ക്ലബ്ബിന്റെ വാതിലുകള്‍ മലര്‍ക്കെ തുറന്നതായി പ്രഖ്യാപിച്ചത് . സാമുദായിക വിമര്‍ശനം ഒരു പരിധി വരെ കുറച്ചു എങ്കിലും , രാഷ്ട്രീയ വിമര്‍ശനം പിന്നെയും തുടര്‍ന്ന് . ക്ലബ്ബിന്റെ മുകളില്‍ കെട്ടി വച്ചിരിക്കുന്ന കോളാമ്പി പോലുള്ള ലൌഡ് സ്പീക്കറിലൂടെ വൈകുന്നേരങ്ങളില്‍ ചലച്ചിത്രഗാനങ്ങ ള്‍ അലയടിച്ചു . തിരഞ്ഞെടുപ്പ് പ്രഖ്യാപന സമയത്തായിരുന്നു ഏറ്റവും രസകരം . രാഷ്ട്രീയ ചൂട് തലയ്ക്കു പിടിച്ച നൂറു കണക്കിന് ആള്‍ക്കാരാണ് ആര്‍ത്തു വിളിക്കാന്‍ തയ്യാറായി എത്തിയ്രുന്നത് .. ഇന്നത്തെ പോലെ ടെലിവിഷനില്‍ ഓരോ മിനുട്ടിലും വരുന്ന അപ്പ്‌ഡേറ്റ്‌സ് ഇല്ല ..ഓരോ മണിക്കൂറിലും ഈ കോളാമ്പി തരുന്ന വാര്‍ത്തകള്‍ മാത്രമേ ഉണ്ടായിരുന്നുള്ളു …

ഈ ക്ലബ്ബിന്റെ ഹാളില്‍ നിന്നാണ് നിന്നാണ് മുല്ലനേഴി കയ്യടിച്ചു തന്റെ കവിത ചൊല്ലി കേള്പിച്ചത് . ഓരോ വരിയുടേയും അവസാന വാക്ക് കൊണ്ടു , അടുത്ത വരി സൃഷ്ടിക്കുന്ന ആ കസര്‍ത്ത് അന്ന് ഒരു പുതിയ അനുഭവമായിരുന്നു .

എടക്കുന്നി വിളക്ക്

വിളക്കിന്മേല്‍ തിളക്കം

തിളങ്ങണ പൊന്നു

പോന്നണിഞഞ്ചാന

ആനക്ക് കോലം

കോലം കേറുമ്പോള്‍

കാലം മാറുമ്പോള്‍

കതിന മുഴക്കം

ജില് ജില് ജില്ലം

ജില് ജില് ജില്ലം

കൊച്ചു കൊച്ചു വാക്കുകള്‍ക്കിടയിലും പ്രത്യയശാസ്ത്രപരമായ ഒരു കതിന അതില്‍ ഒളിപ്പിച്ചിരുന്നോ ?

ജവാന്‍ ആര്‍ട്സ് ക്ലബ്ബിന്റെ വാര്‍ഷികം ആഘോഷിക്കുമ്പോള്‍ നാടകത്തില്‍ അഭിനയിക്കാന്‍ ആബാല വൃദ്ധം എല്ലാവരും ഇരച്ചു കയറി . അഭിനയത്തിന്റെ a b c d അറിയാത്ത ഞാനടക്കം .സ്ത്രീ കഥാപാത്രങ്ങള്‍ ഏറ്റവും കുറവുള്ള നാടകങ്ങള്‍ ആണ് അന്ന് തിരഞ്ഞെടുത്തിരുന്നത്. അഭിനയിക്കാന്‍ സ്ത്രീകളെ കിട്ടണ്ടേ ? രണ്ടു സ്ത്രീകള്‍ ഉള്ള നാടകമാണെങ്കില്‍ല്‍ , ഒരു റോള്‍ നാട്ടിലെ ഒരുത്തനെക്കൊണ്ട്‌ സ്ത്രീ വേഷം കെട്ടിച്ചു . മേജര്‍ റോളില്‍ മാത്രം പുറത്തു നിന്നു വരുത്തി .

തൃശൂര്‍ ലിസ്സി എന്ന് സ്വയം പരിചയപെടുത്തിയ ഒരു കോലമായിരുന്നു ഞങ്ങളുടെ നായിക . തൃശൂര്‍ എല്‍സി അല്പം പ്രസിദ്ധ ആയതുകൊണ്ടാവും , അങ്ങനെ സ്വയം ഒരു ലേബല്‍ ഇട്ടതു . ഒരു വിറകു കൊള്ളിയില്‍ സാരി ചുറ്റിയ പോലെ ഒരു പെണ്‍കുട്ടി അല്ലെങ്കില്‍ സ്ത്രീ . ഭരതന്റെ “വെങ്കല ”ത്തിലെ നടത്തറ കനകം എത്ര ഭേദം ..യുവാക്കള്‍ എല്ലാവരും നടിയുടെ ചുറ്റും കൂടി . മത്സരിച്ചു ഓരോരുത്തരും വീട്ടിലേക്കു ഊണ് കഴിക്കാന്‍ ക്ഷണിച്ചു . ഇത്രയധികം ആരാധകരെ ഒന്നിച്ചു കിട്ടിയ മിസ്സ്‌ .വിറകുകൊള്ളി ഹര്‍ഷ പുളകിതയായി .

മൂന്നാം തരം പൈങ്കിളി നാടകം ആയാല്‍ പോലും അതിലെ സംഭാഷണങ്ങളില്‍ അല്പം മാറ്റം വരുത്തി “പുരോഗമന ” നാടകം ആക്കുന്ന വിദ്യ അന്നുണ്ടായിരുന്നു . ദുഷ്ടനായ ഒരു മുതലാളി ആണെങ്കില്‍ , അയാളെ ഖദര്‍ ജുബ്ബ ധരിപ്പിച്ചു “ഒന്നാം തിയതി ഗുരുവായൂരില്‍ പോകണം ” എന്നൊരു ഡയലോഗ് എഴുതി ചേര്‍ത്തു. മുഹലാളിയുടെ പാദസേവകനായ ഒരു പള്ളീലച്ചന്‍ ഉണ്ടെങ്കില്‍ , നായകനെ കൊണ്ടു അച്ചന്‍റെ മുഖത്ത് നോക്കി “1959 ഇല്‍ നിങ്ങള്‍ അങ്ങനെ ചെയ്തില്ലേ , ഇങ്ങനെ ചെയ്തില്ലേ ” --- എന്നൊക്കെ ചോദിപ്പിച്ചു . അങ്ങനെ നാടകം പുരോഗമന നാടകമായി .

നാടകം ഡയറക്റ്റ് ചെയ്യാന്‍ വന്നത് “കവി ബാലന്‍ ” ആയിരുന്നു . ഗ്രാമത്തിലെ ഏക കവി . നാടകകൃത്ത്. സാഹിത്യകാര്യങ്ങളെകുറിച്ച് സംസാരിക്കാനും സംവദിക്കാനും കഴിവുള്ള ഏക വ്യക്തി . പക്ഷെ സംസാരിക്കാന്‍ ഒരാളെ കിട്ടാതെ അദ്ദേഹം വിഷമിച്ചു. ആരെയെങ്കിലും ഒതുക്കത്തില്‍ കയ്യില്‍ കിട്ടിയിട്ട് വേണ്ടേ ? .. രാത്രി ഒരു മണി വരെ നീണ്ടു നിന്ന റിഹേഴ്സലുകള്‍. പിറ്റേ ദിവസം ശ്യാമള ഉള്ളിലെ സന്തോഷം മറച്ചു വച്ചു , അസഹ്യത കാണിച്ചു പറയന്നു “ ബാലോപ്പ ഈ പിള്ളേര്‍ക്ക് നാടകം പഠിപ്പിക്കാന്‍ പോകുന്ന കാരണം ഉറക്കം തീരെയില്ല ”

വര്‍ഷങ്ങള്‍ക്കു ശേഷം സത്യജിത് റേയുടെ “നായക് ” കണ്ടപ്പോഴാണ് , ബാലേട്ടനെ പോലുള്ള ആള്‍ക്കാരെ പണ്ട് അവഗണിച്ചത് ശരിയായില്ല എന്ന് തോന്നിയത് . ഫ്ലൈറ്റ് ടിക്കറ്റ് കിട്ടാതെ, കല്‍ക്കട്ടയില്‍നിന്നു ഫസ്റ്റ് ക്ലാസ്സില്‍ യാത്ര ചെയ്യേണ്ടി വന്ന പോങ്ങച്ചക്കാരനായ ബോളിവുഡ് നടനും ( uttam kumaar ), അവിചാരിതമായി നടനെ കയില്‍ കിട്ടിയ സ്കൂപ്പ് ഇന്റര്‍വ്യൂ ചെയ്യുന്ന പത്രപ്രവര്‍ത്തക ( sharmila tagore ) .24 മണിക്കൂര്‍ നീണ്ടു നിന്ന യാത്രയില്‍ , അയാളുടെ മുഖം മൂടികള്‍ ഓരോന്നായി പൊഴിയുന്നു . അയാള്‍ പണ്ട് നാടകം കളിച്ചിരുന്ന വായനശാലയും , അതിലെ കമ്യൂ ണിസ്റ്റ്കാരനുമായ ശങ്കര്‍ദായും അയാളെ മാനസികമായി വേട്ടയാടുന്നു .

ഓരോ ഗ്രാമത്തിലും ഇത്തരം കഥാപാത്രങ്ങളുണ്ട്‌. ചരിത്രത്തില്‍ നമുക്ക് മുന്‍പേ നടന്നു പോയവര്‍ . കലയും സാഹിത്യവും കവിതയു നാടകവുമായി നമ്മെ സമീപിച്ചപോഴെല്ലാം , നമ്മള്‍ കളിയാക്കി അടക്കി ചിരിച്ചവര്‍ . സ്വാര്‍ത്ഥമായ ഒരു അജണ്ടയും ഇല്ലാതെ , കലോപാസനക്ക് വേണ്ടി നടന്ന ആ കൂട്ടരെ നമ്മള്‍ വേണ്ട പോലെ പരിഗണിചിട്ടുണ്ടോ ?

ആ ക്ലുബിനെയാണ് ഇന്ന് പഞ്ചായത്തിലെ എല്ലാവരും കൂടി സപ്പോര്‍ട്ട് ചെയ്യുന്നത്. ഗ്രാമത്തിന്റെ അഭിമാനം ആകാന്‍ പോകുന്ന സമയത്ത് രാഷ്ട്രീയവും, ജാതിയും , മതവും , മൂന്നാം വാര്‍ഡ് - ആറാം വാര്‍ഡ്‌ തര്‍ക്കവും മറന്നു എല്ലാവരും കളി കാണാനെത്തി .. ഹൈ സ്കൂള്‍ ഗ്രൗണ്ടില്‍ ആയിരുന്നു ഗെയിം. ഗാലറി ഒന്നുമില്ല ,, എല്ലാവരും ഇഷ്ടമുള്ള സ്ഥലത്ത് നിന്നു കളി കാണുന്നു . ചിലര്‍ കളം മാറി അങ്ങോട്ടും ഇങ്ങോട്ടും ഓടി നടന്നു കളി കാണുന്നു . “റഫറി നമ്മളെ ചതിക്കുമോ ” എന്ന് ഭയപ്പെടുന്നു .

പുതിയൊരു അങ്കം കുറിച്ച് കൊണ്ടാണ് അന്ന് പോലിസ് ക്ലബിനെ നേരിട്ടത് . 4-3-3 എന്നാ രീതിക്ക് പകരം ( 4 forward, 3 mid-half, 3 defends ) അന്ന് പുതിയൊരു ടെക്നിക് ആണ് എടുത്തത്‌ . 4-2-4 ആണ് കളിച്ചത് . പോലിസ് ക്ലബിനെ പേടിച്ചു തന്നെയാണ് ദിഫെണ്ട്സ് എണ്ണം കൂടിയത് . ഗോള്‍ അടിച്ചു നാറ്റിച്ചു കളഞ്ഞാലോ എന്നാ പേടി .

കളി ഡ്രോ ആണ് . തീരാന്‍ 5-6 മിനുട്ട് മാത്രം . അതാ , അവസാനം , പോലീസിന് എതിരായി ഒരു കോര്‍ണര്‍ കിക്ക് . ജനം ആകെ ഇരമ്പി മറിഞ്ഞു ….ഇനി നടക്കാന്‍ പോകുന്ന ഓരോ രംഗവും ജനങ്ങള്‍ മുന്‍കൂട്ടി കണ്ടു . കുട്ടന്റെ കോര്‍ണര്‍ കിക്ക് . VN രവിയുടെ ഹെഡ് കിക്ക് .. ഗോളിന്റെ ശരിയായി വീക്ഷിക്കാന്‍ എല്ലാവരും കിഴക്ക് വശത്തെ ഗോള്‍ പോസ്റ്റിന്റെ അടുത്തേക്ക് ഓടി .

കൂക്ക് വിളിയും ബഹളവും ..പോലിസ് ക്ലബ്‌ അല്പം പരിഭ്രമിച്ച മട്ടില്‍ … VN രവിയെ “പൂട്ടാനായി ” പോലീസുകാര്‍ ചുറ്റും വല കെട്ടി . അതാ … കുട്ടന്‍ കോര്‍ണര്‍ കിക്ക് അടിക്കുന്നു . Aerodynamics- ന്റെ എല്ലാ മാനദന്ധങ്ങളേയും ലംഘിച്ചു കൊണ്ടു ഒരു parabolic path ലൂടെ വായുവില്‍ ബോള്‍ ഉയര്‍ന്നു . ഗോള്‍ മുഖത്തെത്തിയ ബോള്‍ താഴെ വീഴുന്നതിനു മുന്‍പ് , 5 അടി മാത്രം ഉയരമുള്ള രവി എങ്ങനെയാണ് ആ ഹെഡ് ചെയ്തത്.??

യെസ്... ഗോള്‍ . പോലീസുകാരുടെ ഗോള്‍ കീപ്പര്‍ ഇടി വെട്ടേറ്റ പോലെ നില്‍ക്കുന്നു . അന്ന് കണ്ടത് പോലെ ഇത്രയും ജനങ്ങള്‍ ആര്‍ത്തിരമ്പി മറിയുന്നത് വേറെ അധികം കണ്ടിട്ടില്ല … നജിമുട്ദീനും , മണിയും , വിക്ടര്‍ മഞ്ഞിലയും കൂടി കേരളത്തിന്‌ സന്തോഷ്‌ ട്രോഫി നേടിയപ്പോള്‍ നാട്ടില്‍ നടന്ന പ്രകടനം ഓര്മ വരുന്നു …. കപില്‍ദേവും കൂട്ടരും കൂടി വേള്‍ഡ് കപ്പ്‌ നേടിയപ്പോള്‍ , ബോംബെ IIT യുടെ ഗേറ്റില്‍ നിന്നു വിദ്യാര്‍ത്ഥികളും , ചെറുപ്പക്കാരും , ലുങ്കിയുടുത്ത മലയാളികക്ലും കൂടി നടത്തിയ പ്രകടനം …… കോണ്‍ഗ്രസിന്റെ കുത്തക സീറ്റ്‌ ആയിരുന്ന മണലൂര്‍ മണ്ഡലത്തില്‍ ആദ്യമായി ഇടതു പക്ഷ സ്ഥാനാര്‍ഥി V M സുധീരന്‍ ജയിച്ചത്‌ ….ഇങ്ങനെ ആര്‍ത്തിരമ്പുന്ന ആവേശം

അമീര്‍ഖാന്റെ “ലഗാന്‍” ഒരു സിനിമയാണ് . പക്ഷെ ഈ വിജയം ചരിത്രത്തിന്റെ ഭാഗമാണ് …ഷൂസ് വാങ്ങാന്‍ പോലും കഴിവില്ലാത്ത കുട്ടികള്‍ , പോലിസ് ക്ലബിനോട് കളിച്ചു ജയിച്ചത്‌ ഒരു സിന്ദൂരപ്പൊട്ടിന്റെ ഓര്‍മയായി അവശേഷിക്കുന്നു . സാഹസികരും അലവലാതികലുമായിരുന്ന ഒരു കൂട്ടം ചെറുപ്പക്കാരെ , ഒരു ജനകീയ പ്രതയശാസ്ത്രത്തിന്റെ കീഴില്‍ കൊണ്ടു വരുമ്പോഴുള്ള മാറ്റം കൂടിയായിരുന്നോ ?